106th Anniversary of the Bureau of Internal Revenue


Speech of His Excellency
Benigno S. Aquino III
President of the Philippines
At the 106
th Anniversary of the
Bureau of Internal Revenue

[August 2, 2010, Quezon City]

Magandang umaga po sa inyong lahat. Lubos po akong nagagalak na makasama kayo sa pagdiriwang ng ika-sandaan at anim na anibersaryo ng Kawanihan ng Rentas Internas.
Malinaw naman sa atin, lalong lalo na sa mga negosyante at sa mga nakakatanggap ng pay slip tuwing kinsenas, ang tungkulin ng BIR: ang pangasiwaan ang tapat na pangongolekta ng tama at sapat na buwis. Kaya naman hindi nakapagtataka kung bakit ganoon na lamang ang takot ng ilang mamamayan sa inyo tuwing nangangalampag kayo sa mga tila nakakalimot ng magbayad ng buwis.
Hayaan niyong pasalamatan ko kayo ngayon sa inyong malawakang kampanya na nag-uudyok sa mga mamamayang humingi ng resibo. Kaila sa ilan ang kahalagahan nito, kaya buti nandiyan kayo upang ipaalala sa taumbayan ang ating tungkuling bantayan ang ating mga karapatan bilang mamimili.
Halos isang dekadang tila kinalimutan ang kapakanan ng taumbayan dahil sa talamak na katiwalian ng dating administrasyon. Ngayon, alam na natin ang tunay na kalagayan ng kaban ng bayan. Hindi sapat ang pondo para sa mga kakaharapin nating unos, at para tustusan ang mga proyektong panlipunan na tutugon sa edukasyon, kalusugan at trabaho para sa nakararami sa ating mga mamamayan.
Dito ko kakailanganin ang inyong tulong.
Sigaw natin noong kampanya, “kung walang corrupt, walang mahirap.” Lalo pa nating dapat lakasan ang sigaw ngayon. Malaki ang nawawalang pera sa talamak na korapsyon, smuggling at hindi pagbayad ng tamang buwis, kaya nakasalalay sa tamang pamamalakad ng inyong ahensya, at ng iba pang revenue centers ng ating pamahalaan, ang paglikom pa ng mas maraming pondo para sa bayan.
Palalakasin natin ang ating mga revenue centers, at dahil ang BIR ay isa sa mga pinakamahahalagang pinagkukunan ng pondo, paiigtingin pa natin ang mga mabuting nasimulan niyo na noong mga unang linggo ng ating administrasyon: ang pagtukoy at pagsampa ng kaso sa mga indibidwal at organisasyong hindi nagbabayad ng buwis.
Hindi kayo nag-atubili sa inyong pag-aksyon, na inyong ipinakita noong unang mga linggo pa lamang ng ating panunungkulan. Kung noon, may mga may-ari ng pawnshop na nakakaligtas, ngayon, sa pangangasiwa ng ating kagalang-galang na BIR Commissioner, Atty. Kim Henares, mababawasan na ang mga uri nila. Ipagpatuloy niyo ang RATE program upang mas lalo pa nating mapigilan ang pagtagas ng kaban ng bayan dahil sa mga taong tumatakas sa kanilang tungkulin.
Noong panahon ni dating Pangulong Fidel V. Ramos, nakamit niyo ang tax effort ratio na labimpitong porsyento (17%). Magtulungan tayo upang maitaas man lang natin ang kasalukuyang labintatlong porsyento (13%)[1] sa labinlimang porsyento bago matapos ang aking panunungkulan.
Kung nagawa niyo na ito noon, magagawa niyo ulit ito ngayon.
Naniniwala ako na ang mga tulad ninyo na nagsisilbi sa gobyerno ay likas na tapat at mahusay sa trabaho. Marami sa inyo ang wala namang ninanais kundi ang makatulong sa pag-unlad ng ating bansa. Tutulungan namin kayo na maabot ang inyong target na P860 bilyong piso mula sa P830 bilyong piso noong nakaraang taon.
Nagkaisa na ang taumbayan kaya’t samahan niyo kami sa pagtahak ng tuwid na landas, Magtulungan tayo na baguhin ang naging kalakaran tungo sa isang pamamahala na inuuna ang bayan bago ang sarili. Sa inyong pakikiisa, ang tunay na demokrasya kung saan nakakapag-aral ang mga bata, nagagamot ang mga may sakit at naghahanap-buhay ang mas marami pang Pilipino ay maaari na nating marating.
Bago po ako magtapos, gusto ko lang pong pagdiinan, marami pong humihingi ng ating oras  mga araw na ito. Si Atty. Kim Henaras siguro inabisahan ako mga three days ago or four days ago kung pwede ako lumitaw. At sa lakas po ni Atty. Kim Henares at handa po sa suporta sa mga miyembro ng organisasyon na gumagawa ng tama, ako po ay nagutos sa aking appointments underseretary na makarating ako itong araw na ito. Ako po ay hihingi ng konting paumanhin sa aking BIR Commissioner na talagang masigasig na masigasig. Siya po ay miyembro sa aking think tank noong kampanya na ipinaliwanag ang mga nawawala sa ating itinatawag na revenues. At nang tinanong ko, “Ano ba ang pwede nating malikom? Dahil pag ako ang nanalo ganoon pa ang mangyayari dyan, puro problema ang mga haharapin ko at walang pagtustos sa pag ayos ng problema.” May pinangako siya sa aking numero at sabi pa niya conservative iyon. Kaya naman po nung tayo ay naproklama, pinaala ko lang sa kanya ang kanyang ipinangako. Si Secretary Purisima ho isa rin sa mga nakakausap ko mahina siguro dalawa higit tatlong beses kada linggo at hindi naman dahil nagkukulang si Secretary  Cesar Purisima bagkos maganda po ang kanyang trabaho kaya na nga ho kung wala po tayong pagtustos kalimutan na natin ang plano.
Sa pagtatapos na ho talaga, naalala ko noong ako ay bata, naaalala ko ang kwento ng isang gangster sa Amerika na si Al Capone, si Al Capone napakaraming krimen, hindi ho ba? Mamamatay tao, may conspiracy to commit murder, marami hong sinuhulan doon sa mga huwes, mga abogado, District Attorney, ang dami hong krimen.  Lahat na ho ata na nasa mga libro ng batas ay naviolate na po niya at siya ho ay talagang salot sa lipunan ng Amerika noong panahon na iyon. At ang dahilan nung bakit siya ay nakulong ay dahil hindi siya nagbayad ng tamang buwis. Yung salot sa lipunan na hindi mahabla sa pagpapatay ng tao, sa pagnanakaw, sa pananakot at pananambang ay nadali dahil hindi nagbayad ng buwis. Alam niyo ho niyo noong kampanya marami po naglalapit sa atin, sila ho talaga nangangamba pag dumating ang examiner siguro nga ho may itinatago pero nung dulo nag aapela, sabi niya, “Kami naman ho ay handang na ho talaga magbayad lalo na kung may makikita naming may patutunguhan yung aming pinagbabayaran.”
Siguro ho baka kung ako sa inyo, baka simpleng simple, sa inyo ho, nagagawa ng tama alam ko pong may batas na naggagatimpala sa tamang asal. Sisiguraduhin ko po na matitigil na sa lahat ng ating revenues center, yung dating kasabihan, noong panahon po kasi ng nanay ko meron pong mga nakausap tayong taga customs sabi po nila na kapag may nahuli ang gantimpala ay 20% ng kanilang hinuli pero kapag may pinasulot, 10% naman po ang reward pero marami pa rin hong lumulusot. So, tinanong ko, “Bakit ba kayo nagpapalusot na mas mahina ang kita?” Ang sagot naman po nila sa akin,”Kasi po yung 20% narrative pag nagretiro na kami at mamanahin ng amig mga apo. Yung 10% po kaliwaan.” Yan po ang binanggit ko rin kay Ginang Arroyo at siya rin po ay nagsabing, “Tama yan” at aayusin daw niya eh mukha ho yatang hindi naayos kaya ako na po ang magaayos. Kung kayo po may due reward coming from government, asahan ho niyo, kakalampagin ko si Secretary Abad na irelease na agaran ang dapat po sa inyo para naman po yung tamang asal ay talagang pamarisan ng nakararami. Pero iyong kabaligtaran naman po noon ay doon sa attrition law, na title nga po ay attrition, sa mali png ginagawa huwag ho kayo magaalala marami akong oras para hanapin kayo. Kaya pakiusap ko po, magsamasama na tayo dito sa tuwid na landas. Yung mga anak po niyo, mga pamangkin niyo, yung mga  susunod na henerasyon, umaasa na gagawin nating tama ngayon ang ating obligasyon.
Magandang umaga at maraming salamat po.

No comments:

Post a Comment