Pahayag ni Pangulong Aquino ukol sa pagkakamit ni Manny Pacquiao ng kanyang ika-8 kampeonato

Pahayag
ni
Benigno S. Aquino III
Pangulo ng Pilipinas
Ukol sa pagkakamit ni Manny Pacquiao ng kanyang makasaysayang ikawalong kampeonato
[Nobyembre 15, 2010]
Taos puso kong binabati si Manny Pacquiao sa kanyang pagkapanalo kay Antonio Margarito sa Dallas, Texas, USA. Pangwalong titulo na ito sa anim na weight divisions. Hindi pa ito nagagawa ng sino man, at duda akong magagawa pa ito ulit sa aking tanangbuhay.
Hindi lamang kampeon si Manny, at hindi lamang alamat na kinikilala sa buong mundo. Paulit-ulit nang sinabi ito, ngunit uulitin ko ngayon: Manny, isa kang bayani na binigyan na naman tayo ng dahilan upang humarap nang taas-noo sa buong mundo. Matagal mo nang sinasangga ang mga dagok sa ating dangal dulot ng kahirapan at iba pang suliraning hinaharap ng ating bansa. Sa bawat pagkapanalo mo binibigyan mo ang bawat Pilipino ng kumpiyansang harapin ang iba’t ibang problema.

Sa iyong pagkapanalo, ipinakita mo uli kung ano ang kayang abutin ng Pilipinong determinado, disiplinado, at may likas na kagalingan. At hindi lamang sa larangan ng boxing nakikita ang ating kagalingan. Sa JGC, isang kumpanya sa Japan, kung saan tayo bumiyahe sa nakaraang ilang araw, napag-alaman natin na dahil sa husay natin, ang karamihan sa kanilang mga foreign workers ay Pinoy. May pitumpu’t anim na Pilipino na nagtatrabaho dito sa Japan at halos walong daan pang nasa Pilipinas. Yung mga nasa Pilipinas ay parang OFW na hindi kailangang mangibang bansa ngunit ang kanilang ginagawa ay pinakikinabangan ng buong mundo.
Si Manny Pacquiao at marami pa nating mga kababayan ay tunay na mga bayani. Dahil sa kanila, tunay ngang nababawi na natin ang ating pambansang dangal.