Speech of President Aquino at the Turn-over Ceremonies of the Southville 9 Housing Units, Rizal

SPEECH
of
His Excellency BENIGNO S. AQUINO III
President of the Philippines
At the Turn-over Ceremonies of the Southville 9 Housing Units
[October 14, 2010, Barangay Pinugay, Baras, Rizal]

Vice President Jejomar Binay, Chairman of the Housing and Urban Development Coordinating Council; Governor Jun Yñares; Vice Governor Frisco San Juan, Jr.; Mayor Wilfredo Robles; Atty. Chito Cruz, General Manager of the National Housing Authority; mga naimbitang panauhin; mga iba pa nating kasamahan; mga residente ng Rizal; mga kababayan: Isang napakagandang araw sa ating lahat.
Sa likod ng mahigpit nating schedule, hindi po tayo nagdalawang-isip na samahan kayo sa araw na ito. Ang personal na pag-aabot sa inyo ng mga tahanang ito ay isang karangalan. Maraming salamat sa inyong imbitasyon.
Paroo’t parito na po ang unos na dumaan sa ating bansa sa mga nagdaang taon. Bagyo man o baha, lindol man o landslide, tila naging karaniwang pangyayari na sa atin ang mga iba’t-ibang sakuna. Subalit ipinakita natin sa isa’t-isa at sa buong mundo: kailanma’y hindi tayo magpapatinag. Sama-sama tayong umaahon sa bawat paglubog; buong bayan tayong bumabangon sa bawat pagkasadlak. Sa pagbabayanihan, pinatunayan nating wala tayong hindi kayang gawin. Kaliwa’t kanan man ang sumpong ng sakuna, basta tayo ay nagtutulungan, kailanma’y walang makakatibag sa atin.
Mahigit isang taon na ang lumipas nang hinagupit tayo ni Ondoy. Isang taon, ngunit alam kong parang kailan lang para sa ilan sa inyo. Nalinis man ang mga daan, may bakas pa rin ng kahirapang iniwan sa karamihan. Sa dami ng mga nawalan ng bahay, iilan pa lamang ang nare-relocate sa maayos na tirahan. Marami pa ring nakatira sa mga lugar na malapit sa panganib ng baha, sakaling dumating muli ang mga ganitong kalamidad.
Hanga po ako sa mga tulad ninyo: matitibay sa likod ng mga pagsubok. Sagisag kayo ng katatagan ng isang tunay na Pilipino.
Tulad ninyo, maraming kinaharap at kinakaharap na hamon ang ating administrasyon. Sa kabila ng mga ito, hindi rin tayo magpapatinag. Ngayong nakamit na natin ang tagumpay, saka pa ba tayo bibigay? Sa pagwaksi sa malubhang kondisyong dulot ng kahirapan, sa inyo pa rin nanggagaling ang aking lakas. Tayo po ay nagdadamayan at sa ganitong paraan, lahat tayo ay magtatagumpay.
Ilang buwan pa lamang matapos tayong mailuklok sa pagkapangulo, agad na po nating hinarap ang mga problemang ito. Kabalikat ang iba’t ibang ahensiya—ang HUDCC, na itinatag ng aking ina at ngayo’y nasa kamay ng ating Bise Presidente; ang mga sangay nito na tulad ng NHA; at mga lokal na pamunuan—naninindigan tayo upang makamit ng ating mga kababayan ang layuning magkaroon ng maayos, maipagmamalaki at sarili nilang tahanan.
Ang pagbabahagi natin ng mga pabahay sa Southville 9 Housing Project ay bagong pinto para sa bagong buhay – isang pagbubukas ng inyong mas magandang simula, at pagsasara sa kung anumang alaalang dala ng nakaraan. Ngayon, abot-kamay na natin ang pinapangarap nating bahay at lupa para sa ating mga pamilya.
Sa kasalukuyan, mula sa target na 2,800 na housing units, 2,600 na ang naipagawa at may 957 na pamilya na tayong nailipat at nabigyan ng disenteng tahanan. Patuloy pa po natin itong dadagdagan. Pangarap ko pong makita na ang bawat pamilyang Pilipino ay magkaroon ng sarili nilang bahay at lupa. Kaya naman po natin higit na pinapatibay ang mga programang pabahay.
At batid po nating walang silbi ang pagkakatayo ng libu-libong tahanan kung wala namang nakaugat ditong aktibo at maunlad na pamayanan. Kaya naman po maliban sa inyong mga bahay, naniguro po tayo na may mga community at livelihood facilities na magagamit ninyo sa pagpapaunlad ng iyong kabuhayan. Sa kasalukuyan po ay may Baras National High School at Day Care Center na po tayong mapapasukan ng ating mga anak. Nagagamit na din po natin ang ating Multi-Purpose Hall, ang Ynares Learning Center at ang covered court. Lahat po ng ito ay bunga ng maigting na pakikipag-ugnayan ng lokal na pamahalaan sa mga pribadong sektor at mga NGOs. Maraming salamat po sa inyo.  Kayo ang patunay na sa mga ganitong public-private partnerships, walang ibang direksyon ang ating bayan kundi kaunlaran lamang.
At hindi po dito magtatapos ang pagkakaisang ito. Magdadagdag pa po tayo ng labinlimang (15) silid-aralan para hindi na po magsiksikan ang ating mga anak sa mga eskwelahan. Maliban sa barangay hall, palengke at kapilya, itataguyod din po natin ang isang multi-purpose hall para sa iba’t-ibang programang pangkabuhayan na maaari ninyong pagkakitaan at health center upang mapangalagaan ang kalusugan ng inyong pamilya. Lahat po ng ito, magagawa lamang kung bawat isa sa atin ay buong-pagkukusang mag-aambag sa katuparan ng ating pinapangarap na maunlad na pamayanan. Lahat po ng ito ay walang-tigil na isinusulong ng ating administrasyon dahil nagtitiwala kaming buhay ang diwa ng People Power, at handa ang bawat Pilipinong magbayanihan upang tapusin na ang kahirapan.
At hindi po nagtatapos sa pagtugon ng iilang problema ang ginagawa ng ating pamahalaan. Sa tulong muli ng lokal na gobyerno, sisiguruhin po nating may mga ahensiyang nakatalaga sa paghahanda upang maiwasan ang mga paparating na kalamidad.  Mas magiging maagap na rin po tayo tuwing may mga bagyo matapos nating repasuhin ang weather forecasting system ng PAGASA. Malalaman niyo na po agad, hindi lang ang mga natural na sakunang parating, kundi maging ang mga nararapat ninyong gawin upang makaiwas sa perwisyong maaaring idulot nito. Lahat po ng ito ay ginagawa natin para sa inyong kapakanan at kaligtasan.
Kasabay po sa matagumpay na pag-aabot ng mga tahanang ito ang patuloy ninyong pakikipagtulungan sa gobyerno. Makilahok, sa halip na magreklamo; makibahagi sa solusyon sa halip na dumagdag sa gulo. Nasa iisang bubong na muli tayo. Marami pa tayong kailangang gawin; marami pa tayong kailangang kumpunihin sa nag-iisa nating bayan.
Sa inyong lahat: welcome home. Heto na ang inyong mga bagong tahanan: pugad ng kaginhawaan, at harinawa’t pugad ng darating na masaganang kinabukasan para sa inyong pamilya.
Maraming salamat po.
Support this blog

No comments:

Post a Comment